ISKU SOO BIXII UGU WEYNAA EE MUSLIMIINTA KENYA
OO DHACAYA JIMACAHA
-
Taliban oo Abaalmarin ku bixineysa qofkii soo
dila kii sameeyey sawir gacmeedka...
-
Turkiga: Joojinta Alaabada/Daawooyinka ka
timaada Denmark iyo Norway
- Wasiirada Arrimaha Dibada
Sweden oo la kulantay danjiriyaasha dalalka Islaamka
- Midowga Yurub, Qaramada
Midoobey iyo Ururka Islaamka oo isku afgartay...
- Wasiirkii hore Arrimaha
Dibada Denmark oo codsaday in la casilo tafaftirihii wargeyska
Jylland-Posten
- Denmark oo diiday iney la
shaqeyso Immaamyada Muslimiinta dalkeeda
- Baadari dhaleeceyey
wargeyskii aflagaadeyey Rasuulka NNKH
- Wargeyskii aflagaadeyey
Rasuulka oo doonaya inuu soo bandhigo sawiro wax looga sheegayo
Yahuudii Hitler-ku gumaaday
Taliban oo Abaalmarin ku bixineysa qofkii soo
dila kii sameeyey sawir gacmeedka...
Sida ay werisey Aljazeera oo soo xiganeysey
wargeyska AIP (Afgan Islamic Press), qofkii dila kii sameeyey sawir
gacmeedkii Aflagaadada ku ahaa Rasuulka NNKH " waxa ay Taliban
siineysaa 100 Kiilo oo dahab ah," sida uu yiri Mullah Dadullah.
Dadullah waxa kale oo uu
yiri Taliban waxay siineysaa shan kiilo oo dahab ah qof kasta oo
dila Danish, Norwegian ama German.
- AFGHANISTAN: 600 oo qof
oo mudaharad ku dhigayey magaalada Qalat oo ku taal koonfurta
Afganistan ayaa waxaa rasaas ku furay booliska, waxaana la
sheegay in ay dhinteen saddex qof (warar ayaa dhimashada
gaarsiiyey shan qof), 20 qof oo kalena waa ku dhaawacmeen.
Meelaha kale oo mudaharaadyada xooga lehi Arbacadii ka dheceen
waxaa kamid ah Pakistan iyo Ciraaq.
- FRANCE: Wargeys ka soo
baxa France oo magaciisa layiraahdo
Charlie-Hebdo
ayaa Arbacadii dib u daabacay sawir gacmeedyadii Aflagaadada ku
ahaa Rasuulka NNKH, waxana uu wargeyskaasi ku soo darsaday sawir
dheeraad.
Dhanka kale Qoraa aad looga yaqaan
dalka France oo magaciisa la yiraahdo Eric Geoffroy ayaa yiri:
waa laba wajiilayn habka ay reer galbeedku u maareeyeen sawir
gacmeedyada lagu aflagaadaynayey Nebi Muxamed NNKH. Waxana uu
intaas ku daray isagoo la hadlayey IslamOnline in ay reer
Galbeedku ilowsan yihiin oraahda falsafeedka caanka ah ee ah
xorriyada qof waxa ay dhammaataa marka ay bilaabato xorriya qof
kale.
Turkiga: Joojinta Alaabada/Daawooyinka ka
timaada Denmark iyo Norway
"Laga bilaabo talaadadii, waxaa 110 ah
maqaasiinada (stores) waaweyn laga nadiifiyey alaabada ka timaada
Denmark iyo Norway" waxaa sidaas warbaahinta u sheegay Vahit Kiler
oo k atirsan xisbiga AKP. Waxana uu dhammaan dalalka Islaamka ugu
baaqay in ay joojiyaan alaabooyinka labadaas dal (Denmark & Norway).
Xubin kale oo ka tirsan baarlamaanka Turkiga ayaa ku baaqay in
turkigu joojiyo daawada (insulin) ee laga keeno Denmark. Waxana
xildhibaankaasi yiri waa in dib loo eego qandaraasyada shirkada
daawada ee Denmark ee loo yaqaan NOVA Nordisk taas oo
farmashiyayaasha Turkiga keenta boqolkiiba 60% daawada nooca
Insulin. Taas oo kharashkeedu yahay 60 million dollars.
ISKU SOO BIXII UGU WEYNAA EE
MUSLIMIINTA KENYA OO DHACAYA JIMACAHA
Canab Abdule | canabmumtaz@yahoo.com
 Qoraa
aad looga yaqaan dalka France oo magaciisa la yiraahdo Eric
Geoffroy ayaa yiri: waa laba wajiilayn habka ay reer
galbeedku u maareeyeen sawir gacmeedyada lagu
aflagaadaynayey Nebi Muxamed NNKH. Waxana uu intaas ku daray
isagoo la hadlayey IslamOnline in ay reer Galbeedku ilowsan
yihiin oraahda falsafeedka caanka ah ee ah xorriyada qof
waxa ay dhammaataa marka ay bilaabato xorriya qof kale.
AKHRI |
Qaadiga
sare ee muslimiinta Kenya sheekh Hammad khasim ayaa ugu baaqay
muslimiinta ku nool guud ahaan wadanka Kenya in ay ka taxadaraan
qalalaaso ka dhasha mudaaharaadyada la qabanqaabinayo in laga
sameeyo dhamaan magaalooyinka muslimiinta ay dagaan ee wadanka
Kenya.
Mudaaharaadyadan oo la sameyn doono maalinta jimcaha ee nagu soo
aadan hadii Alle idmo,ayaa Sheikh Hamad oo taageersan in ay si
nabaqdgelyo ah ku dhacaan mudaaharaadyadaas looga soo horjeedo
aflagaadadi loo geestay Nabigeena Maxamed (NNKH) waxaa uu ku
booriyay muslimiinta in ay ilaaliyaan sumcada diinta islaamka marka
ay sameynayaan banaanbaxyadaasi wuxuuna si gaar ah ugu baaqay
dhalinyarada in aysan geysanin falal ay kamid yihiin Qarbudaada iyo
rabshadaha
Maalinta jimcaha ayaa waxaa la filayaa masaajidada ku yaala
magaalooyinka waaweyn ee muslimiinta ay ku badan yihiin in khudbada
salaada jimcaha looga hadlo warbaahinta ku xadgudubtay Rasuulka
Kariimka Muhamed (NNKH) iyo in la qabto salaada ka dib banaanbaxyo
si nabad galyo ah u dhaca oo ay ku muujinayaan shucuurtooda
islaanimo ee diidan in diintooda lagu xadgudbo.
Markii ugu horaysay wadankan Kenya waxaa ka hadlay baaqna ka soo
saaray Gollaha culumada iyo Imaamyada Gobolka Somalida ay dagto ee
W.bari kenya,Imamyada masaajidada ku yaala magaalooyinka Gaarisa,
Mandhera iyo Wajer ayaa looga hadlay salaadii khudbada ee jimcihii
aan hore gafkii loogu gaystay nabigeena Muxamad NNKH Qaar ka mid ah
Warbaahinta reer galbeedka gaar ahaan waxa ay culumada eedayn usoo
jeediyeen iyo cambaarayn Wargayska ka soo baxa dalka Denmark iyagoo
waliba ka dalbaday Muslimiinta Kenya in ay wax la qaybsadaan
malaayiinta Muslimka ah ee dunida iyagoo dowladana u diray hadal ah
in ay albaada u laabto safaaradeeda dalka Denmark.
Canab Abdule |
SomaliTalk | Kenya | canabmumtaz@yahoo.com
Wasiirada Arrimaha Dibada
Sweden oo la kulantay danjiriyaasha dalalka Islaamka
Ikraam Cali-kaar
|
WARAR KOOBAN: |
|
30 Sept 2005: Joornaal ka soo
baxa Denmark (Jyllands-Posten)
ayaa daabacay sawir gacmeedyo aflagaado ku ah Nebi Muxamed.
20 Oct 2005: Ambaasadoorada 11 dal ee Muslim ah u
fadhiya Denmark ayaa waxay warqad u direen ra'iisul
wasaaraha Denmark ay ku weydiisanayaan in ay la shiraan,
ayagoo ugu baaqay in uu wax qabato wargeyska daabacay sawir
gacmeedyada, waxana uu ra'iisul wasaaruhu diidey kulankaas.
Oct 14, 2005: Lix iyo toban hay'adood oo Muslimiin ah
Reer Denmark ay ayaa cambaareeyey wargeyska
Jyllands-Posten, waxana
sheegeen in Muslimiinta la daan-daansanayo.
20 Oct 2005: Muslim Safiirada
Muslimka ayaa waxay cabasho u gudbiyeen ra'iisul wasaaraha
Denmark.
10 Jan 2006: Wargeys reer Norway
ah oo lagu magacaabo Magazinet, ( Christian newspaper
ee Norway)ayaa daabacay sawir gacmeedyadii wargeyska Denmark
ee aflagaadada ku ahaa Rasuulka NNKH.
25 Jan 2006: Muftiga
dalka Sacuudiga Sh. Cabcicasiis Aala-Sheekh uu soo saaray
fatwo uu ugu yeerayo shirkadaha sacuudiga, iyo guud ahaan
ganacsatada muslimiinta inay jaraan xiriirkooda dhaqaale ee
ay la leeyihiin shirkadaha laga leeyahay Denmark,
26 Jan 2006: Saudi Arabia ayaa u
yeertay safiirkoodii u fadhiyey Denmark. Waxaana sucuudiga
ka bilowday joojinta alaabta laga keeno Denmark.
30 Jan 2006: Waxaa weerar lagu
qaaday xafiiska Midowga Yurub ee Gaza ayadoo la weydiisanayo
raali gelin in ay bixiyaan
31 Jan 2006: Joornaalkii Denmark
ayaa bixiyey wax u eg raali gelin
1 Feb 2006: Wargeysyo reer Yurub
ah ayaa mar kale daabacay sawir gacmeedyadii iyagoo ku
taageeraya Denmark iyo waxa ay ugu yeeraan Xorriyatul Qowlka,
wargeysda daabacay waxaa kamid ah France, Germany, Italy iyo
Spain .
3 Feb 2006: Dad mudaharaadaya ayaa isugu soo baxay meelo
badan oo k amid ah dunida, sida London UK, Ciraaq,
Pakistan, iyo Indonesia
4 Feb 2006: Waxaa dad caraysani
weerareen,dabna qabadsiiyeen safaaradaha Denmark iyo Norway
ee dalka Suuriya.
5 Feb 2006: Waxaana mudaharadyo
lagu qabtay 25 dal. Dad mudaraadayey ayaa gubey safaarada
Denmark ee magaalada Beyruut, Lubnaan. Waxaa is
casiley wasiirkii arrimah agudaha ee Lubnaan.
6 Feb 2006: Ciidamada Booliska Afganistan ayaa rasaas ku
furan dad mudaharadaadayey halkaas waxaa ku dhintay afar qof.
Magaalada Boosaasona waxaa ku dhintay wiil 14-jir ah.
|
Wasiirada Arrimaha Dibada Sweden
haweeneyda la yiraahdo Laila Freidvalds ayaa shalay oo talaado ah
gelinkii dambe waxey la kulantay labo iyo toban danjire oo ka tirsan
dalalka Islaamka kuwaasoo dhamaantood u fadhiya dalkan Sweden.
Kulanka wasiirada iyo danjirayaashaas ayaa isla soo qaaday xiisada ka
dhalatay sawirada kartuunka ah ee lugu sheegay Nabi Muxamed NNKH ee u
sawiray wargeyska Jyllans- Posten dunida Islaamka si weyn uga
careysiiyey. "Haddii xitaa laga xumaaday sawiradaasi maahan kuwo la
aqbali karro in safaaradahayaga la wax yeeleeyo" ayey tiri wasiiradu oo
u muuqata iney difaaceyso wargeyskii Jyllads-posten, iyadoo ka hadlin
carada muslimiinta muujiyeen siina daba dhigtay hadalkeeda in dalkasta
uu isaga ka yahay mas'uul dhowrista goobaha dibmolaasiyadeed ee
shisheeyaha ah.
Dhinaca kale waxey ka hadashay dowrka ay
saxaafada Sweden ka qaadatay ee la xirriira ineysan soo bandhigin
sawirada muranka dhaliyey oo ay aad u amaantay waxaana ay xustay in
dowladu aysan faraha la soo geli karrin waxyaabaha saxaafadu qoreyso.
Ilaa iyo hada si rasmi ah looma soo bandhigin waxey ka wadahaleen
danjirayaashaasi dalalka Islaamka ah iyo wasiirada Arrimaha dibada
Sweden ee ku saabsan muranka sawirada kartuunka ah ee xiisada degenaan
la'aanta ah dunida ku soo kordhiyey, marka laga reebo iney haweeneydaasi
ka bixi weysay amaanta saxaafada Sweden iyo sharciyada u yaala.
Midowga Yurub, Qaramada
Midoobey iyo Ururka Islaamka oo isku afgartay...
Afhayeenka xoghayaha arrimaha dibada
midowga yurub, xoghayaha Qaramada Midoobay iyo urrurka Islaamka ayaa si
wadajir ah waxey u cambaareeyen sawiradii kartuunka ahaa ee dhaliyey
muranka iyo carada Muslimiinta. Balse waxey taageero u muujiyeen
xorriyada qowlka saxaafada, sidoo kalena waxey dhaleeceyn dusha uga
tuureen dadka sida qaldan saxaafada u adeegsaday ee Islaamka fikirka
qaldan ka bixiyey.
" Waxaan aragnaa Xorriyada saxaafada iney
masuul ka tahay ixtiraamka diimaha iney tixgelisana ay tahay waajib"
ayaa lugu yiri cambaareyntii ay si wada jir ah qoraal ahaanta loogu soo
saaray. Dhinaca kale ururka Islaamka wuxuu eeda dusha ka saaray dowlada
Denmark oo iyadu aan cambaareysay wargeyskii fidna abuuray. Midowga
Yurub, Qaramada Midoobey iyo Ururka Islaamka waxey sidoo kale jaha
wareer diblomaasiyaadeed ku tilmaameen rabshadihii lugu gubay
safaaradihii Denmark ee Beyruut iyo Dimishiq, gaar ahaan ururku wuxuu ku
tilmaamay in falkaasi yahay mid dhaawacaya Islaamka.
Wasiirkii hore Arrimaha Dibada
Denmark oo codsaday in la casilo tafaftirihii wargeyska Jylland-Posten
Wasiirkii hore ee Arrimaha Dibada dalkaasi
Denmark Uffe Ellemann-Jensen ayaa qoraal uu maanta soo saaray ku sheegay
in la gaaray xilligii boorsooyinkiisa banaanka loogu saari lahaa
tafatiraha wargeyskaasi Jyllands- Posten oo ku sheegay inuu isagu masuul
kayahay dhamaan dhibaatooyinkii dhacay ee wargeyskaasi abuuray.
Bilowgii bishii oktoobar ayuu wasiirku
sheegay in arrintani noqoneyso mid saameyn ku yeelata dalkiisa waa sida
qoraalkiisaasi ku xusnyede." Kolkii uu toddobaadkii hore tafatiruhu
sheegay inuu ka xun yahay wixii dhacay, islamarkaasina uusan sawireen
hadduu ogyahay iney sidan u abuurayaan xiisad iyo carrada muslimiinta
hadana ku dhiiraday inuu soo bandhigo, waxey aheyd inuu xilka wareejiyo"
ayuu ku yiri Uffe Ellemann-Jensen warqada uu soo saaray.
Dhinaca kale isagoo weli ka hadlaya eeda
uu soo jeedinayo maamulka iyo madaxda wargeyskaas ayuu sheegay iney
habooneyd iney ka fiirsadaan waxey qorayaan kahor inteysan xaajo faraha
ka bixin, taasoo natiijadii daabacaadooda keentay in la cuno qabateeyo
badeecooyinka dalkaasi ka yimaada ee loo dhoofin jiray dalalka Islaamka.
"Haddii qofku qirtay qalad dhaliyey
qarbudaado iyo iney lix qof naftooda u waayeen waxaan qabaa iney tahay
midaan sugneyn oo maskax ruux weyni adeegsaday aheyn" ayuu yiri wasiirka
oo u arka tafaftiraha nin qeyral ma'suul ah xalka amuurtan lugu damin
karaana tahay isagoo iskaga taga shaqada. "Balse dabka halkaasi ka
shidan sida loo hureyey la garaye sidii loo damin lahaana ha sameeyo"
ayuu sii daba dhigay hadalkiisi uu kaga hadlayey aragtidiisa ku aadan
xiisada diimeed ee wargeyskaasi abuuray ee gilgilay dareenka Muslimiin
badan oo caalamka kamid ah.
Denmark oo diiday iney la shaqeyso
Immaamyada Muslimiinta dalkeeda
Dowlada dalkaasi Denmark ayaa Arabacadii
Feb 8 go'aansatay ineysan dhinaca isdhexgalka kala shaqeyn Iimmaamyada
Muslimiinta ah ee dalkeeda ku sugan, kadib markii ay qeyb ka yihiin ama
aan ka geysan gacantii looga baahna xilligan adag ee dalkaasi ku jiro
waa sida hadalka loo dhigaye. "Waxaa muuqata ineysan ahmiyad u aheyn,
marka dad kale diyaar u ah ayaa jira" ayuu yiri ninka wasiirka uga ah
isdhexgalka dalkaasi Rikke Hvilshöj oo u waramayey wargeyska Berlingske
Tidene.
Hadalka kasoo yeeray wasiirka ayaa
muslimiinta dalkaasi iyo qeybaha kala duwan ee urrurada Islaamka si
wadajir ah u cambaareeyeen waxaana ay ku tilmaameen hadal aan ka
fiirsasho laheyn. Dhinaca kale xeeldheere denish ah waxna ka qora
arrimaha bariga dhaxe ee jaamacad ku taala dalkaasi ayaa fikir xukuumada
ee Immaamyada laqaba wuxuuna hoosta ka xarriiqay iney yihiin kuwo daba
hurinaya halkii wadajir xiisadan sidii loo damin lahaa ay kala shaqeyn
lahaayeen dowlada dalkaasi.
Baadari dhaleeceyey
wargeyskii aflagaadeyey Rasuulka NNKH
Mid kamid ah baadariyada ugu waa weyn ee
dalkan Sweden K G Hammar ayaa si darran u weeraray wargeyskii ku
dhiiraday inuu sawiradii sawiradii foosha xumaa ee sida xun lugu
aflagaadeynayey Nabi Muxamed NNKH. "Waxey ugu talagaleen iney
dareenkooda dhaawaacan" ayuu yiri K G Hammar oo caawa u waramayey
wakaalada wararka Sweden ee TT, isagoo ka qeyb galayey kulan lugu qabtay
gollaha murtida iyo madadaalada magaalada Uppsala ee wadankan Sweden oo
sidoo kalena kasoo qeybgalay Abd al Haqq Kielan oo isagu ah gudoomiyaha
hey'ada gargaarka Swedhish-ka ee Islaamka.
Kulankan lugu qabtay gollaha mada daalada
magaalada Uppsala ayuu muhiimadiisa ahaa soo bandhigista taariikhda
diimaha iyo sidey iskaga soo horjeedeen, gaar ahaan iyadoo mowduucu
kulankaasi ahmiyad siiyey dhacdooyinkii ugu dambeeyey ee la xirriira
sawiradii lugu aflagaadeyey Rasuulka NNKH.
"Daabacadii Jyllands- Posten maaheyn kuwo
qurux badan waxey ahaayeen kuwo fool xumo badan" ayuu yiri isagoo dhinac
kalena ka muujiyey in mushkiladu haatan aysan aheyn kuwo ku eg
cambaareyn oo keliya balse tahay mid dareen asaasi ah oo la taabtay.
Wuxuu arrintan ku tilmaamay midaan sahleyn helista xalkeeda "waana
dareen dhanka bariga ka yimid" ayuu yiri K G Hammar oo sheegay in
dagaalkii koowaad ee dunida markiisi hore ka bilowday dil ka dhacay
magaalada madaxda haatan u ah dalkaasi Bosniya ee Sarjevo,
islamarkaasina cidi aaney ku fekerin in dunidaha lugaha lageli doonto
dagaaladii reer Yurub badan ku hoobteen. Dhinaca kale wuxuu isagoo ku
kalsoon da daalada caalamiga ah ee lugu doonayo in xiisadan lugu damiyo
amaanay dhamaan shaqsiyaadkii gacanta ka geystay ee Islaam iyo masiixi
lahaa.
Wargeyskii aflagaadeyey
Rasuulka oo doonaya inuu soo bandhigo sawiro wax looga sheegayo
Yahuudii Hitler-ku gumaaday
Waxaa muuqata in wargeysku ku dhacay
jahawareer siyaasadeed oo uu doonayo inuu iska meyro ceebta la soo
gudboonatay waaba haddii xishood iyo ceeb garanayaan dadka magaca
saxaafadeed adeegsaday ee aflagaaada u geystay diinta Islaamka iyo
Nabi Muxamed NNKH.
Tafatiraha xagga dhaqanka ee
wargeyskaasi Jyllands- Posten oo ah ninkii lahaa fikirkii lugu
sawiray sawir ku sheegyadii kartuunka ahaa ee Nabi Muxamed NNKH,
Felemming Rose ayaa shaaca ka qaaday in wargeysku diyaar u yahay
iney soo bandhigaan sawirada tartanka ah ee ku baaqay wargeys Iiraan
ah iney soo bandhigaan sawiro muujinaya gumaadkii Hitler u geystay
Yahuuda. Tafatiraha wargeyskan oo wareysi uu siiyey telefeyshin
Mareykan ah ayuu sheegay in tartankaasi wargeyska Iiraaniga ah ku
baaqay kala qeybgalayaan haddii loo arkayo dhex dhexaadnimo.
Dhinaca isagoo hadana dib ka eegay
cawaaqib xumada ka iman karta haddii sawiro kartuun ah oo wax
loogaga sheegayo dadkii Yahuuda ahaa ayuu sheegay in marka hore
xagooda ay dhowrayaan sawirada ay soo bandhigaan wargeyska Iiraaniga
ah ee amuurtan daboolka ka qaaday.
"Reer Galbeedku hadey sawiradaasi ay
daabaceen ay ku sheegeen cabirka xorriyatal qowlka, waxaana anagana
u sheegeynaa inaan sawiradaasi u adeegsaneyno xorriyada saxaafada oo
jawaab u ah sharciga ay reer galbeedku adeegsadeen" ayuu yiri Fred
Mortazavi oo kamid ah tafatiryaasha wargeyskaasi Iiraaniga ah.
Tafaftiraha wargeyskaasi Jyllands- Posten Carsten Juste oo maanta
gelinkii dambe amuurtan ka hadlayey ayaa sheegay ineysan diyaar u
aheyn soo bandhigaan sawiradaasi ee Yahuuda gumaadkooda looga
hadlayo.
Hadaba markaad arrinkan eegto waxaa
kaaga soo baxaya sida aan Islaamka loo texgelin ee damiirkooda liita
awgeed loo aflagaadeyey Rasuulkoodi Muxamed NNKH, halka wargeyskaasi
uu diiday inuu sawiro sawirada la sheegay in yahuuda quseyso,
taasina ay ku tuseyso sida ay reer galbeedku Yahuuda iyo muslimiinta
u kala siiyeen mudnaanta iyo qiimeynta bani'aadnimo. Taasi waxaa
kaaga darran inaan marna laga hadlin xalka dadkan niyadooda dilan
tahay ee wax loogu dhimay muqadasadkooda waxa laga hadlayna ay tahay
oo keliya qarbudaada loo geystay dhismayaashaasa safaaradaha reer
galbeedka ee muslimiintii careysneyd wax yeeleeyeen.
Ikraam Cali-kaar
SomaliTalk. Gothenburg- Sweden
|
