WAABA-YAABE,CADDE MUUSE MA DOORASHUU KA RABAA DADKA PUNTLAND, MASE DAGAAL
IYO BURBUR AYUU UGU SOCDAA KUNA CASUMAYAA?!!!
Waxaan ahay
muwaadin soomaliyeed oo halwadeen ka ahaan jiray qarankii somaaliya, 14kii
sano ee somaaliya ku jirtay burburka waxaan ku sugnaa Puntland waxaana ka
soo qabtay hawlo muhiim ahaa, ilaa heer aan isu taagey u tartamidda jagada
madaxweynemimada Puntland, aadna waa la iigu fishay la-iiguna saadaaliyey
ilaa saacadahii ugu dameeyey oo wax iska beddeleen natiijadii doorashada
faragelin dibadeed darteed.
Waxaan ka mid ahey somaalida jecel in ay dadkooda iyo dalkooda wax wanaagsan
u qabtaan,hadii kalena ka soo horjeeda cidkasta oo waxyeelayneysa
xasiloonida, jiritaankiisa iyo horumarkiisa, magacayguna waa Muuse Xaaji
Saciid(Abees).
Markaan dib ugu soo laabto ujeedada qoraalkan aan ku xusayo Cadde Muuse waa
sidan:
Cadde, ilaa intaan ka ogahay wuxuu ka mid ahaa saraakiishii xoogga dalka ee
qarankii somaliyeed u
tababaray ciidamadiiqalabka sidey.
Markii somaaliya burburkii nasiibdarrada ahaa ka dhacay Cadde wuxuu u
baxsaday dalka dibadiisa waxna kama ogayn duruufihii ka jiray somaaliya gaar
ahaan Punland.
Markii ugu horraysay oo Puntland magaciisa laga maqlay waxay ahayd 2002dii
isagoo nasiibdarro kolkaas xambaarsanaa qorshe jifi hoosaad, wuxuuna
hogaaminayey isagoo jeneraal cadde ah kooxo maleeshiya ah oo hubaysan,
kuwaas oo uu kaga hortegay ciidamada maamul goboleedka Puntland oo ka amar
qaadan jiray cabdulaahi yusuf.
Ficilkaas xun ee uu cadde ku tallaabsaday, ahaana ficil noocaas ah oo
puntland ka dhaca kii ugu horreeyey aad iyo aad ayaa bulshada puntland ula
yaabtay ugana argagaxday waxaana laga filayey cadde inuu ka odayeeyo wixii
dhibaatooyin jiray waqtigaas,maadaama uu ahaa oday dalka ka maqnaa mudo
dheer.haddii uu abaalkaas dhigan lahaa maata ayuu libinteeda u aayi-lahaa
waxaase dhacday(FULAYOOW GUULI KUU DHOWEYDAA).
ismutuxintii iyo wax ismoodkii hungada ahaa, kuna dambeeyey hungada ee cadde
ku soo qorshaystay Canada natiijadiisii waxay noqotay jeneraal cadde oo
sabab u noqday in dhegta dhiigga loo daro haadkana loo loogo boqolaal
dhallinyaro ah, isaguna gacmo dhiig-leh ula cararo ceel afwayn.
Maalmo yar kaddib ,cadde wuxuu u hoydey, heeshiisyo hoosena la galay
cabdullahi yusuf. Talaabadaas oo dad badani ku tilmaameen guuldarradii
labaad ee cadde xantoobsado waxaa soo dhoweeyey cabdullahi yusuf oo qorshe
siyaasadeed ka lahaa shirweynaha dib u heshiinta somaliya ee kenya,aadna u
doonayey inuu mar uun iska soo afjaro wixii dhibaatooyin ka taagnaa
Puntland.
Warar xog-ogaal ah ayaa sheegaya in codsiyadii cadde u gudbiyey cabdullahi
yusuf ay ka mid ahayd in cabdullahi ku wareejiyo cadde madaxweynenimada
puntland, sidaas darteedna cadde mar kasta wuxuu ku lifaaqnaa cabdullahi
meel kasta oo uu tago kolkii shirku ka socday Nairobi,inkasta oo aan
tastuurka puntland qorayn in laba qof isku wareejin karaan maskabkaas ama
jagadaas.
Hadaba iminka oo la sugayo in ay dhaqso u dhacdo doorashada puntland. ayaa
cadde muuse meelo badan ka sheegay inuu musharax yahay,isagoo ay ka muuqato
inuusan waxba iska waydiin danbiyadii gacan ku dhiiglenimada ahaa ee uu ka
galay shacabka puntland ee uu ka sugayo hada in ay u codeeyaan.
Kaaga sii darane, fagaarayaashii Cadde Musse ka jeediyey hawadiisa
Musharaxnimo, wuxuu raaciyey hanjabaado ah inuu burburinayo midnimada,
xasiloonidda iyo jiritaanka Puntland, haddii qorshaha uu wataa ugu fuli
waayaan sida uu isagu rabo. Haddaba waa yaabe, waxaa su'aal mudan: Caddoow,
horta ma iska shaandheysay hirarka halista ah ee aan isgeyin ee aad isku
khasbeyso? Ma doorashaad ka dooneysaa dadka reer Puntland, mase dagaal
sokeeye iyo burbur? Run sheegoo, ma sidaas baad xil ummaddeed ku qaadi karta
kuna caafimaad qabtaa? Maxaad u maleysay shacabka sharafta badan ee u
dhintay una soo halgamay nabada iyo nidaamka maamul ee ka jira Puntland,
isla markaana ah kuwii aad shalay xasuuqday ubadkooda?
Cadde Musse waa ninka keli ah ee reer Puntland ee caadifad gaar ahaaneed
looga hayo xafiiska Daahir Riyaale, waxaana filayaa in Soomaalidu wada
aqrisatay wararka Cadde lagu taageerayo ee ku jira Internet ee sheegaya in
Cadde yahay ninka iska leh madaxweyne nimadda Puntland iyo dekedda Bossaaso,
iyo waxyaabo badan oo aan afkeygu karin.
Sida warar xog-ogaal ah sheegayaan, waxaa jira heshiis qarsoodi ah oo
dhexmaray Cadde iyo Daahir Riyaale, kaasoo ujeedadiisu tahay in Riyaale ku
taageero Cadde sidii uu ugu soo bixi lahaa madaxweyne nimadda Puntland,
Caddena markuu kursiga ku habsado Riyaale si fudud ugu soo dhaweeyo
xuduudkii Ingiriisku lahaan jiray ee goboladda Sool, Sanaag iyo Cayn, haddii
aanu ku guuleysan kursigana loo hubeeyo ciidamo uu kula diriro maamulka
Puntland, waana arintaas oo kale meesha dadka bari dagaa ka yiraahdeen "Ari-boowe,
aallatahay!".
Iyadoo Cadde ogyahay heshiisyada shuhubada ah, hanjabaadiisuna ku saleysan
yihiin oo lagana dhadhansan karo hadalkiisa iyo goolaaftankiisa, ayuu hadana
maamulka, waxgaradka iyo shacabka Laascaanood ugu tagay inay doortaan indho
adayg awgiis.
Ugu danbeytii, madaxtinimada Puntland meeli ugama banaana nimaan Ilaah aqoon,
iimaan laheyn, oo aan amaanada xejin karin, danbiile iyo daneyste ah, oo aan
aqoon saneyn u adeegidda dalka iyo dadka, oo aan doonayn ilaalinta
jiritaanka, midnimada, xasiloonida, horumarka, iskuna kalsooneyn.
Shaqo kasta, gaar ahaan mida siyaasada iyo ummad hogaaminteed, ninkastaa
ehel uma aha.sidaas darteed waxaa intaas oo dhan ka caafimaad qaba
madaxweynaha hadda haya talada Puntland: Maxamed Cabdi Xaashi. Waxaa intaas
u sii dheer aqoon iyo waayo aragnimo maamul, waxaana anigu maanta kula talin
lahaa dadka reer Puntland inay isaga dib u doortaan, kuna tix galiyaan
hufnaantii iyo howlihii uu hore u soo qabtay iyo duruufaha hada ka jira
Puntland.
Fiiro gaar ah: Musharaxiinta u tartamaya madaxtinimada Puntland waa badan
yihiin, saaxiibana waa ku leeyahay, sida: Abshir Musse, Ahmed Barre, Bile
Qabowsade iyo rag kale, waxaanse si gaar ah wax uga sheegay Cadde Musse. Wax
dhibaato ah oo aniga iyo Cadde noo dhexeeya ma jirto, wax nabcoodi ah oo aan
u hayaana ma jirto, sidaasna kuma saleysna qoraalkeygu, balse sababtu waxay
tahay waxaan wax ku leeyahay ayuu u tartamayaa, taasaana isku kaaya keentay,
nimaan u qalmina waa igu waajib inaan uga digo ummadda si looga digtoonaado.
Musse Xaaji Saciid "Abees"
abees11@yahoo.com
Daabaco
Boggan | Print