Barnaamijkii Radio Xoriyo
04 Mar. 2005
- Meles Zanawi oo mar kale ku celiyay
inuu ciidamo u dirayo Soomaaliya.
- Cudurka qallalka carruurta oo ka
dillaacay Gobolka Tigreega
- Wasiirrada gaashaandhigga ee dowladaha
ku bahoobay ururka goboleedka IGAD oo ka hadlaya arrimaha Soomaaliya.
- Qaramada Midoobey oo diiddan in
ciidamo Itoobiyaan ah Soomaaliya la keeno.
- Iyo Barnaamijkii Aragtida Halgamaaga.
======================
Meles Zanawi oo mar kale ku celiyay inuu
ciidamo u dirayo Soomaaliya.
Ra’iisal wasaaraha Itoobiya keligii taliya
Meles Zenawi ayaa arbacadii mar kale ku celiyay inuu diyaar u yahay inuu
ciidamo u soo diro dalka Soomaaliya. Meles Zenawi wuxuu hadalkan ku
dhawaaqay seddex maalmood ka dib markii hooggaamiyayaasha kooxaha iyo
xubnaha Baarlamaanka Soomaaliya ee ka soo jeeday Muqdisho ay diideen in
Soomaaliya la keeno ciidamo ka socda dalalka Soomaaliya deriska la ah, gaar
ahaa Itoobiya.
Xubnaha Baarlamaanka Soomaaliya ee sida
wadajirka ah u diiday in Soomaaliya la keeno ciidamo ka socda dalalka
deriska ah ayaa Itoobiya ku canbaareeyeen inay taageero hub iyo dhaqaale
isugu jira siiso kooxaha hubaysan ee Soomaaliya ka jira, isla markaana ay
ciidamadeedu ku dadaali doonaan oo kaliya sidii dhidibbada loogu aasi lahaa
danaha ay Itoobiya ka leedahay dalka Soomaaliya.
Dhinaca kale C/llaahi Sh Xassan Cali, oo
xubin ka ahaa guddigii xaqiiqa raadinta ee dhawaan booqday gobollada
Soomaliya qaarkood,muddana ku xidhnaa magaalada Garowe, ayaa arbacadii ku
soo laabtay magaalada Muqdisho.
Shir jaraa’id oo uu ku qabtay C/llaahi Sh.
Xassan Hotel Saxafi ee magaalada Muqdisho ayuu ku sheegay inuu jiro qorshe
qarsoodi ah oo lagu doonayo in lagu weeraro magaalada Muqdisho, qorshahaas
oo ay diyaarisay xukuumadda Itoobiya, iyadoo kaashanaysa saraakiil soomaali
ah.
C/laahi Sh Xasan wuxuu sheegay in qorshahaasi uu ka dhigan yahay in
magaalada Muqdisho ay duullaan ku qabsadaan 11 kun oo askari oo Itoobiyaan
ah, kuwaasoo magaalada Muqdisho ka soo gali doona labada waddo ee kala ah
waddada Balcad iyo midda ka timaada dhinaca Afgooye.
Hadalka C/llaahi Sh Xasan ayaa la filayaa inuu sii kordhiyo dareenkii ay
qabaan dadwaynaha soomaaliyeed intooda badan ee ah inay diiddan yihiin in
dalkooda la keeno ciidamo Itoobiya ka socda.
Cudurka qallalka carruurta oo ka dillaacay
Gobolka Tigreega
Cudurka qallalka ama dabaysha loo yaqaano
ee carruurta ku dhaca ayaa ka dillaacay woqooyiga Gobolka Tigreega, sidaas
waxaa sheegay Xafiiska isku xidhka arrimaha bani’aadamnimada ee Qaramada
Midoobey.
Hay’adaha caafimaadka ee xukuumadda
Itoobiya ayaa sugay in cudurka qallalka carruurta lagu arkay labo carruur ah
oo ku dhaqan Gobolka Tigreega. Labadaas caruur midkood ayaa ah gabadh labo
sano oo kaliya jirta.
Cudurka qallalka carruurta ee laga helay
Gobolka Tigregu wuxuu horseeday in Ururka Caafimaadka Adduunka ee WHO uu
Itoobiya ka dhigo dalkii 14-aad ee lagu arko fayraska keena cudurka qallalka
carruurta.
Waa markii ugu horraysay ee cudurka
qallalka carruurta lagu arko Itoobiya muddo afar sano ah, wasaarada
caafimaadka ee xukuumadda Itoobiyana ayaa ku andacootay in cudurkani uu kaga
yimid dhinaca Suudaan.
Qaramada Midoobey ayaa si wayn ula
dagaallanta cudurkan, waxaana dalalka lagu arko loo qaybiyaa tallaal cudurka
lagaga hortego, iyadoo lagu talajiray in cudurkan dunida laga cidhib-tiro
inta uuna sannadkani dhamaanin.
Wasiirrada gaashaandhigga ee dowladaha ku
bahoobay ururka goboleedka IGAD oo ka hadlaya arrimaha Soomaaliya.
Wasaarada arrimaha dibada ee dalka Uganda
ayaa maalintii Talaadada ahayd shaaca ka qaadayin : wasiirrada
gaashaandhigga ee dalalka Bariga Afrika ayaa toddobaadka denbe ku kulmi
doona dalka Uganda, si ay uga wada-xaajoodaan ciidamada nabad ilaalinta ah
ee lagu talajiro in loo diro dalka Soomaaliya.
Wasiirrada gaashaandhigga iyo saraakiil
millatariga ah oo ka socda dalalka xubnaha ka ah urur goboleedka IGAD ayaa
isniinta ku kulmi doona magaalada Kambala, si ay u dhegaystaan warbixintii
guddiga xaqiiqa raadinta ee safarrada ku soo maray gobollada Soomaaliya,
isla markaana ay u diyaariyaan warbixin ku saabsan qorshaha nabad ilaalinta
ee Soomaaliya.
Wasiirrada iyo saraakiishani waxay diyaarin
doonaan falanqayn ku saabsan xaaladda Soomaaliya, waxayna soo bandhigi
doonaan warbixin koobaysa tirada ciidamada loo baahan yahay, dhaqaalaha ku
baxaya iyo qaabka loo agaasimi doono.
Sargaal u hadlay wasaarada arrimaha dibada
ee dalak Uganda ayaa sheegay in mucaarada ka imanaya gudaha Soomaaliya ee ku
saabsan diidmada ciidamo shisheeye oo Soomaaliya la geeyo, ayna hakin doonin
qorshaha IGAD ee ah in ciidamo nabad ilaalineed loo diro dalka Soomaaliya,
si ay nabadgelyada dalka u sugaan.
Qaramada Midoobey oo diiddan in ciidamo
Itoobiyaan ah Soomaaliya la keeno.
Wakiilka xoghayaha guud ee Qaramada
Midoobey u qaabilsan arrimaha Soomaaliya Wanston Tapmen ayaa markii ugu
horraysay muujiyay mawqifka Qarmada Midoobey ee ku aaddan dhibaatada
siyaasadeed ee laga yaabo inay ka dhalato ciidamo ka socda dalalka deriska
ah oo Soomaaliya la keeno iyo khilaafka sii kordhaya ee arrintaas ku saabsan.
Wanston Tapmen oo u warramayey Idaacadda
BBC-da laanteeda afka Ingiirsiga ayaa sheegay in Qaramada Midoobey ayna
aqbali doonin in dalka Soomaaliya nabad ilaalin loo keeno ciidamo ka socda
dalalka Soomaaliya dariska la ah, wuxuuna tilmaamay inay taasi xasaasiyad
keeneyso, isla markaana ayna nabad horseedaynin.
Wanston Tapmen wuxuu soo dhoweeyay in
Soomaaliya loo diro ciidamo ka socda dalalka Midowga Afrika, Jaamacadda
Carabta iyo wadamo kale, balse wuxuu qiray in Qaramada Midoobey ay si fiican
u garwaaqsan tahay dhibaatada ka dhalan karta haddii ciidamo Itoobiyaan ah
loo diro Soomaaliya.
Dhinaca kale, Safaaradda Mareykan-ka ee
magaalada Nairobi ayaa kulan isugu yeedhay xubno ka tirsan dowladda FKMG ah
ee Soomaaliya, kuna jira labada gole ee baarlamaanka &golaha
wasiiradda.Xubnaha kulankaas ka qayb galayna waxaa ka mid ahaa gudoomiyaha
Barlamaanka Shariif Xasan Sheekh Aadan Raisul wasaare ku xigeenka Prof
Maxamuud C/laahi Jaamac (sifir), iyo xubno kale oo uu ku jiro wasiirka
amniga qaranka Mohamed Qanyare Afrax,halka ay kulankaasi qaadaceen w/arimaha
dibada c/llaahi Sheekh ismaaciil iyo w/qorshaynta iyo iskaashiga caalamiga
ah C/risaaq juurila.
Wadahaladaas ayay dowladda Mareykan-ku ku
cadaysay inay horay uga aamusneyd arrimaha Soomaaliya hadda kadibse aysan ka
aamusnaan doonin oo ay qaadan doonto doorkeeda kaga aadan arimaha soomaaliya
iyo weliba hadal wasaarada arrimaha dibada ee maraykanku ay ka soo saari
doonto xaalada soomaaliya.
Radio
Xoriyo
04 Mar. 2005
C/nuur Sh. Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 31 MB ee dhererkeedu
yahay 9820 KHZ, Maalmaha Talaadada iyo Jimcaha 7: 30PM waqtiga Afrikada Bari
Faafin:
SomaliTalk.com | Feb 4, 2005
»DOWLADDU
CID WALBA WAA U DAN [Dr. Black]
»MA
RA'ISULWASAARE MISE RA'ISULWASAARE-SHARAFEED
»Guushii
Golaha SRRC Waa Gumeeysi Doon ??? [Eng.Cabdi]
»Haa
Hala Keeno Ciidan shisheeye oo Caalami Ah..[Jannogale]
Xildhibaannadii Xabashida Diiday iyo Kuwii Raacay [C/waxid]
»Aragtiyada
kala duwan ee keenista Ciidama Shihseeye [Samatalis]
»Waayaabe
Ethiopia somali maisu keenaysaa mase.... [Saajinka]
»Ammaanka
Magaalada Kismaayo:: [Faalladii
Cabdiqadar]
»Waayaha:
"Inay
na'anfacaan ayaan udhalney mise inay nadhibaan!"
»Farxadii
Qarniga ee Madaxwaynaha Soomaaliya& Rasysulwasaaraha
»Xal
loo Raadinayo Arrinta Xaraashkii Xaafuun | C/waxid
Kulaabo bogga www.SomaliTalk.com
|