Midowga Maxaakiimta Islaamiga ah ayaa si weyn uga xumaaday hadalkii ka soo
yeeray Ra'iisul Wasaare Geeddi ee ahaa in Maxaakiimtu Degmooyinka Balcad iyo
Jowhar ay ka gaysteen falal isugu jira Dil, Dhac iyo kufsi, waxayna warkaasi ku
tilmaameen in uu yahay mid la doonayo in lagu qariyo guulaha ay Midowga
Maxaakiimtu ka gaareen xaaladda Soomaaliya oo ay ahyd mid cakirsaneyd Mudo
16-sano ah.
"Geeddi waxa uu ku dhawaaqay hadal sii kala fogeynaya labada dhinac oo dadaal
loogu jiro in laysu soo dhaweeyo" ayay yiraahdeen Midowga Maxaakiimta oo
beeniyay warka ka soo yeeray Ra'isul Wasaare Geeddi, hadalkaas oo uu maalintii
shalay yiri mar uu kulmay goliha wasiirada ee DFKMG..
Waxaa la xaqiijiyay in Midowga Maxaakiimta Islaamiga ah aysan wax Dil, Dhac iyo
Kufsi aysan ka gaystan Magaalooyinka Balcad iyo Jowhar, iyadoo Maleeshiyada
Maxaakiimta dhamaantood laga saaray Magaalooyinka Jowhar iyo Balcad, waxaana
maalintii shalay ahayd la magacaabay guddi ku meel gaar ah oo sii maamula
Magaalada Jowhar.
Xildhibaanadii ku sugnaa Magaalada Baydhabo oo intoodii halkaa ka cararey
Dad wargal ah oo ka yimid Magaalada Baydhabo ayaa sheegay in badan
Xildhibaanadii Baarlamaanka in ay isaga soo tageen Magaalada Baydhabo oo xarun u
ahayd Dowladda Federaalka. Xildhibaanadaasi ayaa la sheegay in ay halkaasi uga
soo tageen kaddib markii ay hanjbaadyo uga yimaadeen maleeshiyo ku sugan
deegaanka oo sheegay in magaalada Baydhabo ay xoog ku qabsadeen maleeshiyo uu
keenay Madaxweyne C/llaahi Yuusuf, iyadoo taasina ay garab socoto Ismaandhaafka
ugubka ah ee soo kala dhexgalay Dowladda iyo Maxaakiimta Islaamiga ah. Qaar ka
mid ah Xildhibaanada Baarlamaanka ee soo gaaray magaalada Muqdisho ayaa waxay
sheegeen in xitaa ay ka soo tageen Gawaridoodii arrimo la xiriira dhinaca
ammaanka, waxay kaloo sheegeen in Magaalada Baydhabo ay ka soo raaceen gawaarida
rakaabka dadwey-naha ee isaga kala goosaha Muqdisho iyo Baydhabo. Baxsashada
Xildhibaanada Baarlamaanka waxaa sii dhiirageliyay markii Golaha Baarlamaanka uu
go'aan ku gaaray in Soomaaliya la keeno ciidamo ka socda wadamada safka hore,
taasoo ay si weyn uga soo horjeesteen Culuma'u-diinka Gobalada Baay iyo Bakool,
iyagoo ku hanjabay cid kasta oo go'aamisay in Soomaaliya ay soo galaan ciidamo
ka socda wadamada safka hore ay la dagaalami doonaan. Xildhibaanadii
Baarlamaanka oo si xor ah ku mari jiray Magaalada Baydhabo isla markaana ka
caweyn jiray Baararka waaweyn ayaa la sheegay in arrintaasi haatan ay dhamaatay
iyadoo la sheegay in ay cabsi weyn soo wajahday.
Dowladaha Mareykanka iyo Yemen oo ka wada hadley arrimaha Soomaaliya...
Waxaa dalka Yemen ku sugan taliyaha ciidamada Mareykanka ee Bariga Dhexe Gen.
John Abizaid, waxa uuna maalintii shalay ahayd la kulmay
Madaxweynaha wadanka Yemen Cali Cabdala Saalax, waxayna isla soo qaadeen arrimo
la xiriira xaaladda Wadanka Soomaaliya, waxaa lagu sheegay in Madaxweyne Cali
Cabdala Saalax uu warbixin ka siiyay xaaladda wadanka Soomaaliya iyo arrimaha ku
soo kordhay.
Labada dhinac ayaa isku afgartay in ay si wadajir ah looga hortago kooxaha
argagixisada ah ee doonaya in ay gabaad ka dhigtaan Soomaaliya, waxayna sheegeen
in labada wadan ay iska kaashaan doonaan dhinaca badda iyo Duulimaadyada.
Janaraalka ayaa la filayaa in uu yimaado wadanka Itoobiya oo ay isla soo qaadi
doonaan arrimaha Soomaaliya, iyadoo ciidamada Itoobiya la sheegay in ay ka
gudbeen xuduuda wadanka Itoobiya iyo Soomaaliya.
Maxkamadda Islaamiga ah ee Ifka xalan oo xukun Dil ah ku
fulisey..
Maxkamadda Islaamiga ah ee Ifka Xalan ayaa maalintii shalay
ahayd xukun dil ah ku fulisay gacan ku dhiigle Cilmi Baaxasan Caddow kadib
markii 11/8/2005 uu degmada Afgooye ku dilay marxuum la oran jiray Saney Cumar
Xuseen.
Dilkaan oo ka dhacay meel fagaare ah ayaa waxaa ka qaybgalay dadweyne aad u fara
badan, waxa uuna Xukunkaan go'aan ka gaarista uu soo jiitamayay mudo aad u fog,
iyadoo mar uu u waramayay Saxaafadda Daahir Cumar Xuseen oo la dhashay
marxuumkii la dilay ayaa waxa uu sheegay in ay si aad ah ugu faraxsan yihiin in
xukun cadaalad ah la mariyo Cilmi Baaxasan, isagoo sheegay in Ehelada uu ka soo
jeedo ay dhowr jeer ka wada hadaleen in arrinta lagu dhameeyo diyo, hase yeeshee
arrintaasi waxa uu sheegay in ay dhinaca kale diideen kadibna lagu soo afjaray
Shareecada Islaamka.
Hay'adda COGWO oo wacyigelin dhinaca nabadda ah u furtay
16-ka degmo ee G/Banaadir
Hay'adda COGWO oo inta badan looga bartay inay wacyigelin
dhinaca nabadda ah ka fuliso dalka, gaar ahaan Gobalka Banaadir ayaa maalintii
shalay ahayd waxa ay 16-ka degmo ee gobalka Banaadir uga furtay barnaamij
wacyigelin ah oo dhinaca nabadda ah oo ay ka qaybgaleen qaybaha kala duwan ee
Bulshada, waxayna Hay'addu ugu talagashay barnaamijkaan sidii Bulshada loogu
baraarujin lahaa faa'iidada nabadda iyo xasiloonida.
Mar aan booqanay xarunta Degmada Waabari, ayaa waxaa halkaasi
kula kulanay qaybaha kala duwan ee bulshada oo ka qaybgalayay Siminaara ay
howlwadeeno ka ahaayeen Ha'adaha COMDES iyo SHOBAY, waxana siminaarkaasi furay
Khadiijo Mugambe oo si weyn ugu mahadcelisay intii soo qaban-qaabisay
barnaamijkaan waxayna soo jeedisay in barnaamijyada noocaan oo kale ah la
joogteeyo si bulshada loogu baraarujiyo dhinaca nabadda, waxaa kaloo ka hadlay
Caasho Cabdi Diini iyo Tifeey Cabdi Gacal, waxayna labadoodu sheegeen in nabaddu
tahay furaha nabadda bulshada looga baahan yahay in mar kasta ay ka shaqeeyaan,
sidoo klae, waxaana booqanay, xarunta COCO oo iyana lagu qabanayay barnaamijka
wacyigelinta nabadda ee Gobalka Banaadir, waxaana ka qaybgalay 30 xubnood oo ka
kala socday qaybaha kala duwan ee bulsada ee degmada Xamar Jajab, waxaana furay
Aamino Aadan Cabdi (Caga Baruur) oo ah guddoomiyaha COCO waxayna sheegtay in
bulshada Soomaaliyeed ay haatan si aad ah ugu baahan yihiin nabadgelyada
maadaama ay 16-sano ku soo jireen dhibaato, waxayna Hay'adda COCO barnaamijkaan
la qaybanayay Hay'adda SOWJO oo iyagu gacan ka helayay Hay'adda COGWO, waxaan
ahalkaasi ka hadlay guddoomiye ku xigeenka Hay'adda SOWJO Shamso Cabdi Qayax oo
sheegtay in barnaamijyada la xiriira dhinaca nabadda ay mar kasta waxtar u
leeyihiin bulshada soomaaliyeed oo si weyn ugu ooman, waxaan casharo ka
bixinayay Siminaarkaasi Macaani Khaliif Baana.
Waxaa kaloo barnaamij noocaan oo kale ah lagu qabtay degmada
Xamar-Weyne waxaana soo qaban-qaabiyay Hay'adaha BUURFUULE iyo SIFA, waxaana ka
qaybgalay 30-xubnood oo ka kala socday qaybaha kala duwan ee bulshada, waxaana
halkaasi ka hadlay Caasho Malaaq Mahdi iyo Faadumo Cismaan Foorto oo kala
matalayay Labadaasi Hay'adood, waxayna sheegeen in shacabka Soomaaliyeed ay si
weyn ugu baahan yihiin nabadda, waxayna sheegeen in ururadooda ay labalaabi
dooaan howlaha dhinaca nabadda ee Xamar-Weyne, sidoo kale Degmada kaaraan, sidoo
kale Degmada Kaaraan ayaa Hay'adaha KAAWO iyo GURYO-SAMO waxay iyana siminaar u
qabteen qaybaha kala duwan ee bulshada, iyadoo xubnihii ka qaybgalay
siminaarkaasi oo ka kala socday Haweenka, Dhallinyarada, Odoyaasha iyo
Waxgaradka ay sheegeen in loo baahan yahay in barnaamijiyada dhinaca nabadda ah
si weyn loogu baahiyo Gobalka Banaadir lana kordhiyo maalmaha la qabanayo.
W/D Amiin Yuusuf
Khasaaro
E-Mail
amiinkhasaaro@hotmail.com
Abdikarim Aden Hussein.
Somalitalk,Nairobi
Somali gaareysa ilaa 40-tameeyo ayaa lagu
xirxirey Magaalooyinka Gaarisa iyo Wajeer saldhigyadooda 3dii-bilood la soo
dhaafey, dadkaasi la xirxiray ayaa la sheegay in ay si sharci daro ah uga soo
gudbeen xadka Somaaliya iyo Kenya.
Dadka Somaalida ayaa wadanka Kenya u yimaada
sababo kala duwan ,dadka maalin walba soo gala wadanka ayaa waxay u badan yihiin
Haween iyo caruur,iyo dhalin yaro shaqo doon ama nololdoon ah oo ka soo cararey
dagaalada mar walba ka soo cusboonaada Soomaaliya.
Dadakaasi soo gala Kenya ayaa aalaba si sharci
darro oo baqtiyaanasiib uga soo talaaba xududaha Soomaaliya iyo Kenya ,
Dadkaasi oo lacag badan looga qaato gubin
fariisimaha Boliiska ee jidadka ,ayaa mararqaar la kulma Booliiska wareega
jidadka ,taaso sababta in dadkii laqabto ka dib la geeyo saldhigyada boliiska
ee magaalooyinka ,maalmo ka dib la soo Taago maxkamad ,ka dibna lagu xukumaa
lacag u dhaxeysa 40-kun shilin ila 10-kun shilin Kenya oo ah lacag badan oo
qofka safarka uusan jeebka ku qaadan Karin.
Dadakaasi la xirxiray ayaa looga yeeraa
ehealadooda iyo qaraabadooda ku dhaqan dibada si ay uga bixiyaan lacagtaasdi ,ka
dibna waxaa dadkaasi la celyaa soomaaliya iyadoo la geyo xududa Soomaalida.
Wasiirka Xanada Xoolaha Dawlada: IRAN,
LUBNAAN, SUUDAAN ayaa balanqaadey in Xoola dhaqatada Soomaalida la siin doono
Maalgalin iyo Tababaro…
Wasiirka Xaanada Xoolaha Dawlada Federalka KMG
ee Soomalida Dr.Ibrahim Maxamed Isaaq ayaa Axadii Barakat Hotel war
warsaxaafadeed kaga hadlay ka qayb galka shirkii 74-aad ee Haya`adaha Xaanada &
Caafimaadka Xoolaha Adduunka ee dhawaan ka dhacay Magaalada Paris, dalka
Farankiiska.
Shirkan sanadkan ayaa waxaa ka soo qayb galey
167- dal iyo 700 wafdi oo ka kala socda hay`ado iyo dalalka ka tirsan Ururkaasi.
Hayadaha ka qayb galaey ayaa waxaa ka mid
FAO,WHO, WORD BANK, WTO,dalalka xuibnaha joogtada ah ee ururka.
Shirka ayaa sanad walba looga hadlaa : Cudurada
joogtada ee ku dhaca Xoolaha dab joogto iyo duur joogtada iyo xoolaha badda ku
nool Xanaaneynta casriga iyo dhawrida xuquqda xoolaha nool iyo Caafimaadkooda.
ka hortaga iyo la dagaalanka cudurada faafa ee
ku dhaca Xoolaha nool,sida dabaka ruubka ,cabeebka iyo hargabka shimbiraha oo
wadamo badan oo adduunka ka mid ku faafey taasoo u qalqalgaliyey caafimaad
xoolaha iyo dadka.
Waxaa kaloo si ba`an looga hadlay xuquuqda
xoolaha ,daryeelkooda &caafimaadkooda , keydka xoolaha cuntada laga helo.
waxaa kaloo xubnaha joogtada ee ururka isla
meeldhigay qaabkii loo maalgalin lahaa xoolaha ku dhaqan wadamada saboolka ee ku
jira ururka .
Dawlada Soomaaliya ayaa waxaa loo balanqaadey
in xoolaha iyo xoolo dhaqatada Somaaliya la siin doono maalgalin iyo tababaro,
wacyi galin ku saabasan daryeelka xoolaha,caafimaadka iyo xanaaneytooda.
Wasiirka ayaa waxa u ka codsadey dalalka
xubnaha joogtada Ururka ee shirka in lacagta xubunimada laga cafiyo ama wax laga
dhaafo madaama Soomaaliya 16-sano ka jirin Dawlad,waxaana loo dhaafey lacag
gaareysa 50-kun,waxaa kaloo wasiirka Dawladaha Carabta iyo Gobolka ka codsadey
taageero dhaqaale iyo tabaro la siiyo Soomaalida Xoolo dhaqatada ah,
Waxaana Balanqaadey Dawladaha Iran ,lubnaan iyo
Sudan Xiliga ay saldhigato dawlada Federalka
Soomaalida.
Dhamaad.
Abdikarim Aden Hussein.
abdikarimhussein@hotmail.com
Somalitalk,Nairobi
Laba Bayaan oo ka kala soo baxdey Gudoomiyihii hore Islaax iyo Afhayeenka
hadda
DHAQHDAQAAQA ISLAAMIGA AH EE SOOMAALIYEED AL-ISLAAX
-
ku: Midowga Maxaakiimta Islaamiga ah.
-
Ku: Dowladda ku meel gaarka soomaaliyeed.
-
Ku: Shacabka Somaaliyeed.
-
Ku: Beesha Caalamka.
BAAQ FURAN
„« ka dib markii aan aragnay marxaladda cusub ee kala guurka ah ee dalka guud
ahaan maraayo gaar ahaan Magaalada Muqdisho.
„« ka dib markii aan aragnay aamuska dheer ee uu ka galay Hogaanka sare ee
(Ururka Al Islaax ee haatan talada haaya arimaha dalka iyo dadka oo aad moodo in
uusanba daneyneynin ka qeyb qaadashada arimahaas Khatarta ah ee dalka, ayaan
waxaan go, aansanay anagoo kala ah Culumada iyo Aqoonyahanka kana tirsn
Golayaalka kala duwan ee (Ururka al-islaax)
1-Waxaan soo dhoweynaynaa isbedelka cusub ee ka dhacay Magaalada Muqdisho ee ah
kacdoonka dadwaynaha ee ay Hormuudka ka yihiin Midowga Maxaakiimta islaamiga ah.
2- waxaan ku baaqaynaa in wadahadal shuruud la, aan ah yeeshaan Maxaakiimta
islaamiga ah iyo Dowladda ku meel gaarka ah kaasoo gogasha u xaaraayo Midnimo ,
nabadgalyo iyo xasilooni ka dhalata dalka soomaaliya.
3-waxaan ku baaqaynaa in si degdeg ah loo dhiso Maamul loo dhan yahay oo uu
yeesho Gobalka Banaadir kaa soo ay ka wada qayb galaan dhammaan qeybaha Bulshada
saldhigna looga dhigaayo maalmulkii hore u jiray
4- waxaan si adag uga digeynaa una diidanahay in dalka la soo galiyo Ciidamo
shisheeye, gaar ahaan kuwa safka hore, waayo waxaan u aragnaa soo gelidoodu in
ay soo kordhinayso colaad iyo dhiig badan oo sii qubta, iyo xalkii oo sii
fogaada.
5- waxaan soo dhawaynaynaa Danaynta isa soo daraysa ee beesha caalamka ee
arimaha soomaaliya, waxaan ugu baaqaynaa in soomaalida lagu garabgalo sidii ay u
xasilin lahayd arimaheed gudaha ah lagana daayo faragelinta lagu haayo loona
guntado sidii dib u dhis iyo gargaar loola soo gaari lahaa dadka iyo dalka
soomaaliyeed.
6- waxaan ku baaqaynaa in caalamku uu la soo gaaro gargaar degdeg ah dadka
soomaaliyeed ee ku taabaaloobay Dagaalada iyo Abaaraha isdaba jooga ah, gaar
ahaan waxaan shucuubta iyo Dowladaha islaamka iyo Carabta ugu baaqaynaa ugunaa
yeeraynaa in ay walaalahooda soomaaliyeed isugu garab taagaan sidii ay lugahooda
ugu istaagi lahaayeen.
Dr. Maxed Cali Ibraahim, Guddoomiyihii hore ee Ururka Al-Islaax.
Muqdisho-Soomaaliya.
War-Saxaafadeed ka soo baxay Dhaqdhaqaaqa Al-Islaax
War-Saxaafadeed ka soo baxay Xafiiska Xarakada Al-Islaax ee
Magaalada Muqdisho ayaa waxay si weyn uga hadashay xaaladda wadanku marayo iyo
is bedelada haatan ku soo kordhay dalka, gaar ahaan magaalada Muqdisho, waxayna
Xarakada Al-Islaax ka soo saartay xaaladdaasi dhowr qodob.
-
In xalka Mushkilada Soomaaliya ay ku jirto Soomaalida oo
wada hadasha.
-
In laga shaqeeyo baajinta dhiig sokeeye oo sii daata lagana
hortago wax kasta oo keeni kara sii socoshada dagaal sokeeye.
-
Waxaan ku baaqeynaa Dowladda Federaalka iyo Midowga
Maxaakiimta Islaamiga ah ay dhaqsi u balaabaan wada hadal kana fogaadaan
hadalada dhaawici kara jawiga dib u heshiisiinta.
-
In Xukuumadda KMG ah ay si firfircoon ula falgasho is
bedelada socda, si fiicana u gudato waajibaadkeeda, kana shaqeyso hirgelinta
dib u heshiisiin waarta.
-
In bulshada Soomaaliyeed gacan ka gaystaan xoojinta
dadaalada nabadeynta kana waantoobaan hurinta iyo ka qaybgalka dagaalada
sokeeye.
-
Dowladda Federaalka iyo Midowga Maxaakiimta Islaamiga ay si
wadajir ah uga wada shaqeeyaan taabagelinta maamulka Gobalka Banaadir.
-
In beesha Caalamka iyo Dowladaha deriska ee taageera hiil
iyo hooba la garab taagnaa Dowladda, taageeraaana dhameystirka dib u
heshiisiinta dalka,
Waxaana ku saxiixnaa war-saxaafadeedkaan afhayeenka Xarakada
Islaax ee Soomaaliya Dr. Ibraahim Dasuuqi
W/D Amiin Yuusuf
Khasaaro
E-Mail
amiinkhasaaro@hotmail.com
Faafin: SomaliTalk.com | Jun
20, 2006
Barnaamijkii Radio Xoriyo
20 Jun 2006
Dagaal Gunagado ka dhacay oo
gumaysiga lagu jabiyay.
Dhalinyaro ka tagay magaalooyinka oo
ciidammada xoreynta ku biiray.
Maxaakimta Soomaaliya oo Itoobiya u
digay.
Midowga Afrika oo ansixinaya
ciidammo la geeyo Soomaaliya.
UNHCR oo ka digtay xaaladda
Soomaaliya.
======================
Wariyaha RX uga soo warrama dalka
Ogaadeenya ayaa noo soo sheegay dagaal adag oo toddobaadkii hore ciidammada
xoreynta Ogaadeenya iyo kuwa gumaysatada Itoobiya ku dhex maraya meesha
lagau magacaabo Balli-Sareedo, oo ku yaalla duleedka magaalada Gunagado,
kaasoo ciidammada cadowga loogu gaystay jab iyo halaag aad u ba’an.
Dagaalkan, oo ahaa mid aad u adag,
waxaa ciidammada gumaysatada Itoobiya lagaga dilay inta la ogyahay 94
askari, waxaa sidoo kale laga dhaawacy tiro badab oon faahfaahinteeda la
haynin.
Ciidammada gumaysatada Itoobiya waxaa
sidoo kale aagga Sasabane lagaga gubay labo baabuur oo Uuraal ah oo ay
ciidammo ka buuxeen markii la gubayay, waxaana halkaas ku bas-beelay
labadaas baabuur iyo wixii saarnaa oo dhan. Labadan baabuur, oo la gubay
maalintii jimcaha ahayd ee bisha Juun 17-ka ahayd, waxaa lagu qiyasay
askarta saarnayd 120 askari.
Waxaa sidoo kale toddobaadkii hore
ciidammada gumaystada Itoobiya baabuur Uuraal ah lagaga gubay duleedka
magaalada Qabridaharre, waxaana halkaas ku bas-beelay baabuurkaas iyo wixii
saarnaa oo dhan.
Muddo seddex toddobaad ka yar waa
baabuurkii shanaad ee ciidammada cadowga laga gubo.
Dhalinyaro ka tagay magaalooyinka oo
ciidammada xoreynta ku biiray.
Cadaadiska ay ciidammada Wayaanuhu ku
kordhiyeen dadwaynaha Soomaalida Ogaadeenya bilihii u denbeeyay wuxuu sii
kordhiyay go’aankii iyo dhiirranaantii dadwaynaha ee la xidhiidhay diidmada
ay diiddan yihiin gumaysiga Itoobiya ee dalkooda haysta.
Waxayna
dadwaynuhu sii labanlaabeen kalsoonidii iyo taageeradii ay u hayeen
ciidammada xoreynta Ogaadeenya. Waxaa arrintaas ugu denbeeyay dhalinyaro 21
gaadhaya oo toddobadkii hore ka baxay degmada Xamaro ee gobolka Nogob,
kuwaasoo ku biiray ciidammada xoreynta Ogaadeenya ee dagaalka qadhaadh kula
jira ciidammada caga-jiidka ah ee Ogaadeenya lagu soo daabulay.
Dhalinyaradan, oo shan ka mid ahi ay gabdho ahaayeen, ayaa go’aankan qaatay,
ka dib markii ay u adkaysan waayeen cadaadiska iyo dulmiga lagu hayo
dadkooda, waxayna go’aansadeen inay hubka u qaadaan sidii dulmigaas dadkooda
iyo dalkooda uga dulqaadi lahaayeen.
Maxaakimta Soomaaliya oo Itoobiya u
digay.
Guddoomiyaha Midowga Maxaakimta
Islaamiga ah Sh shariif Sh Axmed ayaa maalintii axadda ahayd shirk jaraa’id
ku qabtay magaalada Jawhar ee dalka Soomaaliya, wuxuuna sheegay in
xukuumadda Itoobiya ay waddo daandaansi marka ay ciidammadeeda soo galinayso
dalka Soomaaliya.
Sh Shariif wuxuu shirkaas jaraa’id ku
sheegay in ciidammada Midowga Maxaakimta Islaamiga ahi ayna hadda diyaar u
ahayn inay weeraraan ciidammada Itoobiya ee Soomaaliya soo galay, laakiin
wuxuu ka digay damaaciga xukuumadda Itoobiya kaga jira dalka Soomaaliya iyo
sida ay isugu dayayso inay ka hortegto xasillooni ka dhacda Soomaaliya.
Sheekhu wuxuu kaloo sheegay in ciidammo
shisheeye ah oo la keeno dalka Soomaaliya ayna waxba ka taraynin
nabadgelyada dalka, isla markaana ay bar-kuma-taal ka dhigayaan
wadahadallada uu Midowga Maxaakimta Islaamiga ahi diyaarka u ahaa inuu la
galo dawlada ku meelgaadhka ah ee Soomaaliya.
Midowga Maxaakimta islaamiga ah oo
markii hore oggolaaday inuu wadahadal toos ah la galo madaxwaynaha dawlada
ku meelgaadhka ah ee Soomaaliya ayaa sheegay inaanuu wadahadalladaas dawlada
la gali doonin inta ciidammo Itoobiyaan ahi dalka Soomaaliya gudihiisa ku
sugan yihiin.
Arrintan ayaa ka denbaysay, ka dib
markii ciidammo Itoobiyaan oo si wayn u hubaysan la xaqiijiyay inay sabtidii
soo galeen meelo ka mid ah gobolka Gedo ee dalka Soomaaliya.
Ciidammada Itoobiya ayaa la sheegay
inay yimaadeen magaalooyinka Doolow iyo Luuq. Wararka qaarkoodna waxay
sheegayaan inay ciidammada Itoobiya ay tageen magaalada Baydhabo ee xarunta
u ah dawlada ku meelgaadhka ah ee Soomaaliya.
Wararku waxay kaloo intaas ku darayaan
in ciidammo aad u fara badan oo Itoobiyaan ah sidoo kale la soo dhoobay
xuduudda u dhaxaysa Ogaadeenya iyo Soomaaliya, kuwaasoo wararka qaarkood
sheegayaan inay ku sii jeedaan magaalada Baydhabo iyo meelo kale oo
koonfurta Soomaaliya ka mid ah.
Dhinaca kale dadwaynaha ku dhaqan
gobolka Hiiraan ee dalka Soomaaliya ayaa si wayn uga cabsi qaba ciidammada
Itoobiyaanka ah ee la soo dhoobay nawaaxiga magaalada Feerfeer.
Dadwaynaha soomaaliyeed ee ku dhaqan
gobolka Hiiraan, oo dadka kale ee soomaalida ah la qaba walwalka ay ka
walwalsan yihiin duullaanka cusub ee xukuumadda Itoobiya ku soo qaadday
dalkooda, ayaa tan iyo markii ciidammada xadka la soo dhoobay muujiyay
walwal iyo cabsi xad-dhaaf ah oo ay ka qabaan ciidammadan nacaka ah ee looga
bartay inay cagta mariyaan wixii dagan ama tabar daran ee ay la kulmaan.
Midowga Afrika oo ansixinaya
ciidammo la geeyo Soomaaliya.
Midowga Afrika ayaa isniintii kulan ku
yeeshay magaalada Addis Ababa oo xarun u ah, waxaana kulankaas lagaga hadlay
qaabkii ciidammo nabad ilaalin loogu magac daray loo gayn lahaa dalka
Soomaaliya.
Midowga Afrika ayaa kulankan isugu
yimid, ka dib markii uu Baarlamaanka dawlada ku meelgaadhka ah ee Soomaaliya
dhawaan soo saaray go’aan uu ku oggolaaday in Soomaaliya la keeno ciidammo
nabad ilaalin ah oo ay qayb ka yihiin ciidammada dalalka Soomaaliya deriska
la ah, gaar ahaan kuwa Itoobiya.
Kulankan ayaa si rasmi ah looga soo
saaray go’aan ciidammo loogu dirayo dalka Soomaaliya, waxaana lagu
diyaariyay qorshe la xidhiidha qaabkii ciidammadaas loo diri lahaa.
Kulankan ayaa lagu go’aamiyay in dalka
Soomaaliya loo diro koox khubaro ah oo ka kooban Midowga Afrika iyo dalal
reer galbeed ah, waxaana kooxdan loogu talagalay inay soo qiimeeyaan siday
ay suuragal u tahay in ciidammo nabad ilaalin ah la geeyo dalka Soomaaliya
iyo meelaha ay ciidammadaasi ka hawlgali doonaan.
Xukuumadda Itoobiya ayaa iyadoo
kulankani aanuu dhicin waxay soo saartay qoraal ay ku faahfaahinayso sababta
ay ciidammadeeda u gaysay xadka Soomaaliya, waxayna tilmaantay inuu waajib
ka saaran yahay inay caawiso dawlada ku meelgaadhka ah ee Soomaaliya oo ay
difaacdo hay’adaheeda kala duwan, waxayna sheegtay in arrintaas ay
masuuliyad gaar ahi ka saaran tahay, ayna masuuliyadaas gudanayso.
UNHCR oo ka digtay xaaladda
Soomaaliya.
Hay’adda Qaramada Midoobey u qaabilsan
arrimaha qoxootiga ee UNHCR ayaa ka digtay in dagaal ka dhex oogma xoogagga
Midowga Maxaakimta Islaamiga iyo dawlada ku meelgaadhka ahi uu sababi karo
dhibaatooyin bani’aadamnimo oo aad u xunxun.
Madaxa Hay’adda UNHCR Antonio Guterres
ayaa sheegay in beesha caalamku ay muddaba ka gaabinaysay inay gacan
taageero u fidiso dawlada ku meelgaadhka ah ee Soomaaliya, taasina ay
keentay in dalka Soomaaliya ku sii jiro xasillooni darro.
Madaxa Hay’adda UNHCR ayaa hadalkiisu ku soo
beegmay xilli ay xaaladda Soomaaliya cirka isku shareertay, isla markaana uu
aad u kordhay walwalka ay beesha caalamku ka qabto inuu dagaal cusub oo lagu
hoobto ka oogmo, iyadoo ay ugu wacan tahay xoogagga awoodda cusub la soo
baxay ee Midowga Maxaakimta Islaamiga ah iyo xukuumadda Itoobiya oo iyaduna
isu diyaarisay inay xoogaggaas dagaal kala hortegto, isla markaana
ciidammadeedii soo galisay dalka Soomaaliya.
20 Jun
2006.
Axmed
Gaal-Eri
Info@radioxoriyo.com
raadioxoriyo@yahoo.com
Radio Xoriyo
waxaad ka dhegaysan kartaa Mawjadda 25 MB ee dhererkeedu yahay 11865 KHZ,iyo
internetka Radioxoriyo.com,Ogaden.com Maalmaha Talaadada iyo Jimcaha 7:
30PM waqtiga Afrikada Bari