A.D. Elmi
adelmi@hotmail.com

In ka badan 15 sanadood oo xiriir ah ayay shacabka Soomaaliyeed agfduub ugu jireen hoggaamiye kooxeedyo tiro badan oo kala jar jaray dalka Soomaaliya, gaar ahaan kuwii ugu xumaa ee Muqdisha oo iyagu la degey si gaar ah sumcaddii shacabka ku dhaqan gobolka Banaadir, xittaa ay arintu u ekaato in dadka reer Muqdisho ay yihiin isma dhaanto iyo dhashood, waxayna taasi rajo beel iyo quus ku abuurtay quluubta dadka reer Muqdisho oo u qaatay inaysan jirin meel ay uga bixi karaan mashaakilkan 15 sano jirsaday, waxayna xamxamta iyo hadalka hoose ee shacabku dhaafi waayay “DAGAAL OOGAYAASHAN ILAAHOW DHINAC NOO DHAAFI” waxay ahayd duco lagu celcelin jiray ilaa iyo inta dhibku jiray, hase ahaatee Ilaahay waa aqbalay baryadii dadka reer Muqdisho waxaana la gaaray waqtigii uu xaqqu qabsan lahaa hawshiisha, baadilkuna uu banayn lahaa goobta. 

Maxkamado Islaami ah oo awel loo dhisay inay la tacaalaan tuugada iyo burcadda qaarkood, ayaa soo ifbaxay, waxayna noqdeen horseedka kacdoonka najaxay ee maanta la wareegay talada gobolka Banaadir kana dhigay goob nabdoon oo la isku hallayn karo, maxkamdahaas oo kaashanaya qaybaha bulshada Soomaaliyeed oo aan hayb iyo qabiil ku kala soocnayn ayaa waxay soo qaadeen waddo dheer oo dhib badan, laakiin Ilaahay sahlay, wadadaas oo ah in shacabkan la badbaadiyo inta ka hartay daanada qabqablayaashii dagaalka, waxay ahayd howl hufan oo ay tahay in cid walba oo u danqanaysa shacabka Soomaaliyeed ay ku farxi karto, waxayna shacabka kacay ee reer Muqdisho iyo Soomaalida kaleba ay rajaynayeen inay heli doonaan taageerada dowladda magaca ah ee aan muruqa, maaliyadda iyo makaan ay ka talisaba lahayn, laakiin taas bedelkeedii waxaa dowladdii ka soo yeeray ereyo aad u qalafsan oo haddana wata ficillo aad u fool xun. 

Markii ay soo hoydeen guulo wax ku ool ah oo shacabku ku talaabsaday ayaa waxaa dowladda ka soo yeeray bilawgii hore waxoogaa ereyo ah oo yididiilo xambaarsan laakiin goor dambe ayay giraantu wareegtay, waxaa laga war helay dowladdii dalka oo u ololeynaysa in waddanka ciidamo shisheeye la keeno gaar ahaan Itoobiya, iyadoo qeybihii hubaysnaa ay bilaabeen ianay wareejiyaan hubkooda intii xoogga looga qaaday mooyee,  waxaa la maqlay dowladdii oo ku celcelinaysa argagixiso ayaa Muqdisho joogta, waa Alqaaciddo waxa ka dagaalamaya Mudisho iyo ereyo kale oo aad u xaraar badan. 

Waqtigaas ka gadaal ayay shacabka Soomaaliyeed dal iyo dibadba is eegeegeen, waxaana la isweydiiyey waxa dhab ahaan loola jeedo hadalka ka soo yeeray dowladdii dalka oo la rabay inay iyadu xil iska saarto hoggaaminta shacabka, ilaalinta xuduudaha dalka Soomaaliya, inay amba qaaddo dib u heshiisiinta dalka, inay ka fekerto sidii ay ugu soo guuri lahayd caasimadda dalka oo la islaaxiyey. 

Ugu dambeyntii waxaa loo fasiray isbeddelka ka yimid dowladda inay tahay mid ku salaysan laba arimood: 

Si kastaba oo ay u jiraan arimahaasi, haddana waxaa la is weydiin karaa dowladdu ma waxay ka shaqaynaysaa danaha Itoobiya mise waa dowlad loo dhisay inay samata bixiso dadkeeda, Dowladdu ma waxay qayb ka tahay ciidamada Maraykanka ee iyagu u xilsaaran la dagaalanka waxa ay ugu yeeraan Argagixisada, maxay dowladda taagta darani ugu meeraysataa argagixiso aan iyada halis ku ahayn, haddiise xittaa ay ka waddo xeelad ay ku shukaasanayso caalamka oo ay is leedahay aad ku soo jiidatid, sow taasi haddana dhinaca kale ma dhuminayso cidda ugu muhiimsan ee loo baahan yahay in la soo jiito, haddii aad dhumiso taageerada shacabkaaga maxay kuu taraysaa mid dibadeed oo weliba og inaad tahay dowlad taag daran oo aan meelna xukumin?. Dowladdu ma ku quus qaadan waysay markii Maraykanku intuu dhinaca kale ka wareegay uu dagaal oogayaashii Muqdisho u xilsaartay la dagaalanka waxa loogu yeero argagixisada, iyadoo weliba dowladdu ay dalka joogto ?.

Haddaba marka arintu halkaas marayso miyaysan shacabka Soomaaliyeed xaq u lahayn inay wixii markaas ka dambeeya ay ka tashadaan dowladdii waqtiga badan ay ka dhursugayeen, miyaysan xaq u lahayn inay kacdoonkooda sii wataan ilaa ay ka gaarayaan miraha halgankooda oo waddanka oo dhanna ay la wareegayaan. 

adelmi@hotmail.com 

Afeef: Aragtida qoraalkan waxaa leh qoraaga ku saiixan

Faafin: SomaliTalk.com | July 19, 2006

Dood-Cilmiyeed: Isbedelka Cusub ee Soomaaliya
Aqoonyahanno ku sugan dalka Canada ayaa ka hadlay kacdoonka Soomaaliya iyo raadka uu... Dhegeysi...